মনু পাড়র মনুষ

April 20, 2016, এই সংবাদটি ৬৮২ বার পঠিত

জালাল নুরী

ধারাবাহিক-৯

 

কুইয়ার ফেরিয়া রশদিয়া কত জাতর যে খানি ।

খেতর গুড়ে নিজর ঘরে জাইতো টানা-টানি ।।

কুটুম কেসরে দিতা তারারে যার ইতাবা নাই ।

মনুর পারো কুইয়ার জারো আর দেকি কই ।।

মুলইবাজারি বসতযে করি মনুনদির কিনারো ।

গৌরব ফুটে ধনিও উটে ঐ মুলই বাজারো ।।

আমরার বুকে আছেতো সুখে মনু নদির সব ।

কিনারো গেলে আনন্দ মিলে আমরার গৌরব ।।

খেয়া নিয়ে খেয়াদিতা ঘাটো থাকতো বইয়া ।

আস্তাদিনো রুজির ধীয়ানো তান নৌকা লইয়া।।

বেতর ছাতা মাতাত দিতা হকলর আছিল জানা ।

বৈটা বাইয়া হফারো গিয়া পাইতাবা এক আনা ।।

দু:খর মাজেও সুখর ঢেউ কেউতো বোঝইন না ।

জততা ভালা অততাও জ্বালা আগুইন নিবেনা ।।

উড়িয়া আইলা উড়িয়া গেলা আমরার ঐ মাটিত ।

মানুষ যারা মানুষ আমরা মনও রাখাতো উচিত ।।

বাবা গেলা পুয়াও গেলা আরো গেলাবা নাতি ।

তারার নাম তারারও কাম ভুলিয়া যায়না জাতি ।।

জিবনর বাটো মনু নদির ঘাটো লগর সাতি  নাও।

পিরিত আমল বড় একটা বল যদিবা থাকে ভাও ।।

খেয়াও দেইন গানও কইন নাউহর গলইত বইয়া ।

আর কত কাল ভাসব আমি দুঃখর শ্বারি গাইয়া ।।

জাতর বিছারও দূরই আমরার থাকি মনুর পাড়ো ।

জালাল নুরীর মনুয়া পাখি বাসা যে মানুষর ভীড়ো ।।

সমাপ্ত ।

সংবাদটি শেয়ার করতে নিচের “আপনার প্রিয় শেয়ার বাটনটিতে ক্লিক করুন”
  •  
  •  
  •  
  •  
  •  
  •  
  •  
  •  
  •  
  •  
  •